Нурим ва нажоткорим – Худованд. ДОВУД САНОСИ.
Забур 26 bob
1 Нурим ва нажоткорим Худованддир, Кимдан мен қўрқаман? Ҳаётим қўрғони Худованддир, Кимдан хавотирланаман?
2 Ёвузлар этимни ғажимоқ-чун ҳужум қилганда, Ўзлари қоқилиб қулайди, ўша ашаддий ёвларим.
3 Юрагимга даҳшат тушмайди, гарчи Қаршимга жангга тизилсалар ҳам. Ҳатто ҳамла қилсалар ҳам, Комилдир менинг ишончим.
4 Худованддан бир тилагим бор, Фақат ўшани излайман: Худованд уйида умрбод турайин, Худованд жамолини тамошо қилайин, Унинг маъбадини зиёрат қилиб.
5 Оғир кунда У мени ҳимоясига олар, Ўз макони соясида мени яширар, Қоя устига мени юксалтириб қўяр.
6 Энди мен бош кўтариб юраман, Қуршаб олган ёвлар устидан ғалаба қиламан. Худованд маконига тантана ила кириб, Хурсандлик ила қурбонлик келтираман. Худовандни куйлаб васф қиламан.
7 Эй Худованд, Чақирган пайтим овозимни эшитгин, Меҳрибонлик қилиб, менга жавоб бергин!
8 «Ҳузуримни қидиринг» деган сўзингни Мен дилимга тугиб қўйдим. Сенинг ҳузурингни қидираман, эй Худованд!
9 Мендан юз ўгирмагин, Ғазаб ила силтаб ташлама қулингни! Сен менинг паноҳим бўлгансан-ку, Мендан воз кечма, ташлаб кетма, Эй, менинг нажоткорим Худованд!
10 Ота-онам мени ташлаб кетса-да, Худованд мени қабул қилар.
11 Эй Худованд, Ўз йўл-йўриғингни менга ўргатгин, Ёвларим сабабли мени тўғри йўлга бошла!
12 Ағёрим ихтиёрига топширмагин мени! Мана, ёлғончи шоҳидлар, Қаҳр-зўғим сочиб турган зўравонлар Менга қарши ҳужум бошлади!
13 Менга қолса, ишончим комилки, Мен тириклар диёрида қоламан, Худованднинг баракатларини кўраман.
14 Худовандга умид боғла! Бақувват бўл, дадил бўл, Худовандга умид боғла!
