Забур 135 bob

Абадийдир Унинг инояти!

1 Худовандга шукр қилинг, У олижанобдир, абадийдир инояти!
2 Худолар Худосига шукр қилинг, Абадийдир Унинг инояти!
3 Ҳокимлар Ҳокимига шукр қилинг, Абадийдир Унинг инояти!
4 Ёлғиз Ўзи буюк мўъжизалар яратган, Абадийдир Унинг инояти!
5 Осмонни У ҳикмат билан яратган, Абадийдир Унинг инояти!
6 Ерни сувлар устида ўрнатган, Абадийдир Унинг инояти!
7 Буюк осмон ёритқичларин яратган, Абадийдир Унинг инояти!
8 Кундузи ҳукм сурмоғи-чун қуёшни яратган, Абадийдир Унинг инояти!
9 Тунда ҳукм сурмоғи-чун ой ва юлдузларни яратган, Абадийдир Унинг инояти!
10 Мисрдаги тўнғичларни Қирганга шукр қилинг, Абадийдир Унинг инояти!
11 У Бани-Исроилни ўрталаридан олиб чиққан, Абадийдир Унинг инояти!
12 Уларни Ўзининг баланд қўли ила, Ўзининг чўзилган қўли ила озод қилган, Абадийдир Унинг инояти!
13 Қизил денгизни иккига бўлган, Абадийдир Унинг инояти!
14 Бани-Исроилни денгиз ўртасидан ўтказган, Абадийдир Унинг инояти!
15 Фиръавн ва лашкарин Қизил денгизга ағдарган, Абадийдир Унинг инояти!
16 Халқини чўлдан Ўтказганга шукр қилинг, Абадийдир Унинг инояти!
17 У буюк подшоҳларни қириб ташлаган, Абадийдир Унинг инояти!
18 Шуҳрати баланд шоҳларни ўлдирган, Абадийдир Унинг инояти!
19 Амўрийлар шоҳи Сиҳўнни ўлдирган, Абадийдир Унинг инояти!
20 Башан подшоҳи Ўгни нобуд қилган, Абадийдир Унинг инояти!
21 Уларнинг ерини мерос қилиб берган, Абадийдир Унинг инояти!
22 Ўз қули Исроилга мерос қилиб берган, Абадийдир Унинг инояти!
23 Хор бўлганимизда У бизни эслаган, Абадийдир Унинг инояти!
24 Ёвларимиздан бизни халос этган, Абадийдир Унинг инояти!
25 Ҳар бир жонга ризқини Берувчига шукр қилинг, Абадийдир Унинг инояти!
26 Осмон Тангрисига шукр қилинг, Абадийдир Унинг инояти!