Садоқатсиз халқ, садоқатли Худо. АСАФ ҚАСИДАСИ.
Забур 77 bob
1 Эй халқим, Қонунимга диққат этинг, Оғзимдан чиққан ўгитларни тингланг!
2 Масал айтмоқ-чун оғиз очаман, Азалий сирларни баён этаман.
3 Эшитган ҳамда билганларимизни, Ота-боболаримиз бизга айтганларини
4 Ўз ўғил-набираларимиздан яширмайлик, Келажак наслга ҳам хабар этайлик Худованднинг шон-шуҳратию буюк қудратин, Унинг кўрсатган барча мўъжизаларин.
5 У Бани-Ёқуб учун низом ўрнатган, Исроил ўғилларига Тавротни йўллаган. Ўғилларингизга уларни ўргатинг деб, Ота-боболаримизга буни амр этган-ким,
6 Келгуси насл, туғилажак ўғиллар ҳам билсин, Улар эса ўз даврида ўз ўғилларига ўргатсин.
7 Токи улар Худога умид боғласинлар, Тангри яратган ажойиботни унутмасинлар, Амр-фармонларига эса амал қилсинлар.
8 Зинҳор, ота-боболаримиз каби ўжар ва исёнкор, Юраги тош, Худога садоқатсиз насл бўлмасинлар.
9 Ўқ-ёй билан қуролланган Эфраим* ўғиллари Жанг кунида орқага қайтдилар.
10 Улар Худо буюрган аҳдни тутмадилар, У юборган Таврот йўлидан юрмоқ истамадилар.
11 Унинг ажойиботини эсдан чиқариб, Кўрсатган мўъжизаларини унутдилар.
12 Миср диёрида, Сўъан даштида Уларнинг ота-боболари олдида Худо мўъжизалар кўрсатган эди:
13 Денгизни ёриб, ўртасидан уларни ўтказди, Сувларни бир девор каби қилиб қўйди.
14 Кундузи булут билан уларни етаклар, Тунлари эса оташ ёруғи ила йўл кўрсатар эди.
15 Улар учун чўл-биёбонда қояларни ёриб, Катта гирдобдай сув чиқариб берди.
16 У қоялардан оқизган сувлар Улкан дарёга айланиб қолди.
17 Аммо улар гуноҳ қилишда давом этиб, Саҳрода Худойи Таолони ғазаблантирдилар.
18 Нафсларига қараб овқат талаб қилиб, Кўнгилларида Тангрини синаб кўрдилар.
19 Худога қарши сўзлаб, шундай дедилар: «Тангри чўлда дастурхон ёзолармикан?
20 Дарвоқе, У қояни ёриб сув чиқазган, Шунда селдай сувлар оққан эди. Аммо наҳот халқига нон ҳам берар, Гўшт ҳам ҳозирлай билар экан?»
21 Худованд буларни эшитиб ғазабланди, Бани-Ёқубга ўт-сув бўлди, Исроилга қарши жаҳлга минди.
22 Чунки улар Худога инонмадилар, Тан бермадилар-да нажоткорлигига.
23 Шунга қарамай, У юқоридан булутларга амр этди, Осмон қопқаларини очиб юборди.
24 Емоқ учун уларга манна* ёғдирди, Ҳа, самовий ғалла берди уларга.
25 Одамзод фаришталар нонини еди, Уларга тўйгунча озуқа юборди.
26 Кўк юзидан У шарқ шамолини қўзғатди, Қудрати билан жануб елини эстирди.
27 Уларнинг устига тўзондек гўшт ёғдирди, Денгиздаги қумдай қуш-парранда шай қилди.
28 Улар манзилининг ўртасигаёқ, Чодирлари атрофигача буларни ёғдирди.
29 Улар қорни тўйгунча еб-ичишди, Нафслари қонгунча, уларга берди.
30 Ҳануз иштаҳалари узилмаган, Луқмалари ҳамон оғизларида экан,
31 Уларга қарши Худо қаҳри келди, У Исроил йигитларини қирди, Энг бақувватларини ўлдирди.
32 Шунга қарамай, улар яна гуноҳ қилдилар, Худованднинг мўъжизаларига инонмадилар.
33 У уларнинг кунини оворагарчиликда, Умр йилларини даҳшат ичида битирди.
34 Тангри уларни ўлдираётганда улар ўгирилиб, Тонгданоқ Унинг ҳузурига югуришар эди.
35 Худо уларнинг нажот қояси бўлганини, Худойи Таоло уларни қутқариб келганини эслардилар.
36 Лек оғизлари-ла Унга хушомад қилар, Тиллари-ла Унга ёлғон сўзлардилар.
37 Унинг олдида юраклари қийшайган эди, Буюрган аҳдига бевафолик қилдилар.
38 Шунга қарамай, У раҳмдиллик кўрсатди, Гуноҳларидан ўтиб уларни ҳалок этмади. Неча марталаб қаҳрини улардан қайтариб, Бутун ғазабини бирдан тўкмади.
39 У билар эдики, улар ўткинчи махлуқдир, Чиқиб кетиб, қайтиб келмас нафасгинадир.
40 Неча марталаб чўлда Унинг ғашини келтирдилар, Дашт-биёбонда Уни ғазаблантирдилар!
41 Улар Худони қайта-қайта синадилар, Исроилнинг муқаддас Тангрисини ранжитдилар.
42 Улар Унинг қудратли қўлини, Уларни жабр-зулмдан қутқарган кунини,
43 Унинг Мисрда кўрсатган ажойиботини, Сўъан даштида кўргазган ғаройиботини эсдан чиқардилар.
44 Худо Нил дарёсини қонга айлантирди, Мисрликлар сув ичолмай қолди.
45 Уларни чақсин дея ҳашарот галасини юборди, Қириб битирсин дея қурбақаларни йўллади.
46 Уларнинг ҳосилини чигирткага берди, Меҳнатлари самарасини қуртларга едирди.
47 Узумзорларига дўл ёғдирди, Тут-анжирларини ях билан хароб этди.
48 Ҳайвонларини дўлга дучор қилди, Подаларини барқ оташига берди.
49 Уларга қарши қаҳр-ғазаби ўт олди, Бошларига жаҳл, зуғум, балолар келтирди, Талай қирувчи малакларни ҳам юборди.
50 Тангри Ўз ғазабига йўл очди-ю, Ўлимдан сақламади уларнинг жонини, Вабою қирғинга топширди молларини.
51 Мисрда ҳар бир тўнғич фарзандни урди, Ҳом* чодирларидаги бор эркаклик ғурурини йўқотди.
52 Худо Ўз халқини қўйлар каби ҳайдаб чиқарди, Чўлда уларни сурув каби етаклаб борди.
53 Уларни бехатар бошлаб борди, улар қўрқмади, Душманлари эса денгизга кўмилди.
54 Уларни Ўзининг муқаддас ўлкаси ҳудудига, Ўнг қўли эгаллаган бу тоққа келтирди.
55 Ўз олдидан эл-элатларни қувиб чиқарди, Исроил авлодларига у ерни мерос қилиб берди, Уларни ёвнинг чодирларида жойлаштирди.
56 Улар эса ҳали ҳам Худойи Таолони синаб, хафа қилардилар, Низом-қоидаларига риоя этмасдилар.
57 Оталари каби орқага қайтиб хоинлик қилдилар, Ўқи адашган камон каби эгри кетдилар.
58 Тепадаги санамларга топиниб Уни хафа қилдилар, Ўйма бутларга сажда қилиб рашкини қўзғатдилар.
59 Худо буни эшитиб ғазабга минди, Исроилдан жуда қаттиқ аччиқланди.
60 Одамзод ичра У олган Ўз ўрнини, Шилўда* қурган масканини ташлаб қўйди.
61 Ўз шону шавкатин асирликка мубтало қилди, Душманлар қўлига берди Ўз шарафин.
62 Ўз халқини қиличга топширди, Ўз мулкидан ғазаби келди Худонинг.
63 Уларнинг йигитларини ўт ёқиб битирди, Қизлари никоҳ қўшиқларини айтмай қолди.
64 Руҳонийлари қиличдан ўтказилди, Тул хотинлари йиғлаёлмай қолди.
65 Ўша вақт Раббим уйқудан турган каби, Шаробдан кайф қилган ботирдай уйғонди.
66 Душманларига зарба бериб орқага қайтарди, Уларни абадий шармандаликка дучор қилди.
67 Худо Юсуф қавмини рад этган, Эфраим наслини тан олмаган бўлса-да,
68 Лекин Яҳудо авлодини танлаб олди, Ўзи севган Сион тоғини сайлади.
69 Ўзининг азиз маконини фалак каби яратди, Ер куррасидай мангу ўрнатди уни.
70 Худо Ўз қули Довудни танлаб, Уни қўй қўраларидан олиб чиқди.
71 Ўзининг халқи бўлган Бани-Ёқубни, Ўзига айириб олган Исроилни бошқармоқ учун, Довудни мол боқувчиликдан озод қилиб юксалтирди.
72 У эса дил софлиги ила уларга чўпон бўлди, Маҳоратли қўллари-ла уларга бошчилик қилди.
