Мазлумнинг фарёди. ДОВУД ИБОДАТИ.
Забур 16 bob
1 Эй Худованд, салоҳга эътибор бергин, Дод-фарёдимга қулоқ солгин, Макрсиз ириндан унган ибодатимни тинглагин!
2 Юзимни Ўзинг ёруғ қилгин, Кўзларинг тўғриликка етаклансин!
3 Дилимни синаб, кечалари мени йўқладинг, Имтиҳон қилдингу, бирор ёмон ниятни топмадинг. Чунон тилим ила дилим бирдир менинг.
4 Одамлар иш-амалига келганда дейман: Мен Сенинг каломингга риоя қилдиму, Ғаддор йўлларидан ўзимни тийдим.
5 Қадамларимни Ўз роҳингда собит қилгин, Токи оёқларим зинҳор тебранмасин.
6 Сенга нола қиламан, эй Тангрим, Чунки Сен менга жавоб берарсан. Қулоғингни менга тутгин, тингла сўзимни!
7 Ажойиб меҳр-иноятингни кўрсатгин, Эй, илтижо қилувчиларнинг Халоскори! Сенинг қўлинг ҳимоясида Осийлардан паноҳ топса бўлади.
8 Кўз қорачиғидай асрагин мени, Ўз қанотларинг соясида яширгин мени
9 Зарба берган бетавфиқлардан, Ҳар ёқдан ўраб олган жон душманидан!
10 Уларнинг юрагини-ку ёғ босган, Оғизлари мақтанишдан гупурмоқда.
11 Ҳар қадамда бизни таъқиб этиб, Ҳар томонлама ўраб олмоқдалар, Ерга урмоқ учун пусиб ётибдилар.
12 Улар овга зориққан арслонга, Пистирмада пойлаб ётган қоплонга ўхшар.
13 Эй Худованд, тургин! Уларнинг олдини олиб, қулатгин! Ўз қиличинг-ла жонимни фосиқлар қўлидан тортиб олгин!
14 Эй Худованд, шундай одамлардан, Ҳа, шу жаҳоннинг одамларидан Ўз қўлинг билан мени халос қилгин! Улар насибаларини бу ҳаётдаёқ олмоқдалар. Сен уларга раво кўрган озиқ билан қорнини тўқ қил! Ўғиллари қорнини ҳам тўқ қил! Ҳатто келажак авлодга ҳам ортиб қолсин!
15 Мен эса салоҳ ила Сенинг сиймонгни кўргайман, Уйғонганим замон Сенинг дийдорингга тўярман.
