Улуғ Подшоҳнинг тинчлик ҳукмронлиги. СУЛАЙМОН САНОСИ.
Забур 71 bob
1 Эй Худо, Подшоҳга Ўз ҳаққониятингни ато қилгин, Шаҳзодага Сенинг адолатинг ёр бўлсин!
2 У Сенинг халқингни ҳаққоният билан, Фақирларингни инсоф ила ҳукм этсин.
3 Токи тоғлардан элга осойишталик, Тепалардан адолат оқиб келсин.
4 У элнинг фақирларини ҳимоя қилсин, Ғариб-ғураболарни халос этсин, Золимни эса эзиб ташласин!
5 Қуёш балқиб, ой чиқиб тургунча, Барча насллар сендан қўрққайлар.
6 Ўти ўрилган майсазорга тушувчи ёмғир каби, Тупроқни суғорадиган кўк томчилари сингари Шоҳ диёрга баракат келтиргай.
7 У ҳукм сурган айёмда солиҳ яшнагай, Ой йўқ бўлгунча тинчлик-осойиш бўлгай.
8 Денгиздан денгизга қадар, Дарёдан* то ер четларигача У ҳукм сургай.
9 Чўл халқи Унинг олдида эгилажак, Душманлари тупроқни ялаяжак!
10 Таршиш* ва ороллар шоҳлари Унга бож келтиражак, Шабо ва Сабо* шоҳлари Унга ҳадя беражак.
11 Ҳамма подшоҳлар Унга сажда қилажак, Барча миллатлар Унга хизмат қилажак.
12 Зеро У додлаб юрган фақирни, Ҳомийси йўқ қашшоқни қутқарур.
13 Бечораю мискинларга раҳмдиллик кўрсатур, Фақирларнинг жонига ора кирур.
14 Ҳийлагар ва зўравондан уларни озод қилур, Назарида уларнинг қони жуда қадрли бўлур.
15 У узоқ яшасин! Унга Шабо олтинидан берилсин! Доимо У учун дуо қилгайлар, Кундан-кун Уни олқагайлар!
16 Ўлка бўйлаб буғдой ҳосили мўл бўлгай, Лубнон ўрмонларидай бўлгай ҳосили, Тоғу тепа бошларида ҳилпиллагай. Шаҳар аҳли эса ердаги майса каби чечак отгай.
17 Шоҳимиз номи мангуликка туражак, Қуёш тургунча донғи ошажак. Барча халқлар У орқали барака топажак, Ҳамма эллар Уни муборакбод этажаклар.
18 Мўъжизавий ишларни ёлғиз Ўзи бажарувчи Исроилнинг Тангриси, Худойи Таолони олқишланг!
19 Унинг улуғвор исмига абадий офаринлар бўлсин, Бутун ер юзи Унинг шуҳрати билан тўлсин! Омин! Омин!
20 Ишай ўғли Довуднинг ибодатлари шу билан тугади.
