Яратган, Асраганга ҳамду санолар.
Забур 32 bob
1 Эй солиҳлар, Худовандни куйлангиз! Дили тўғриларга ҳамду сано ярашар.
2 Ғижжак чалиб, Худовандга шукр қилинг, Ўн торли чанг билан Уни тараннум этинг!
3 Унга янги бир қўшиқ куйланг, Гўзал оҳанг чалиб, хитоб қилинг!
4 Зеро Худованднинг каломи – ҳақиқатдир, Унинг барча ишлари вафодорлигидан далолатдир.
5 Солиҳлик ва адолатни Худованд севар, Унинг инояти ила дунё тўлгандир.
6 Кўк Худованд каломи билан бунёд бўлган, Барча осмон лашкари* Унинг амри ила яралган.
7 Денгиз сувларини уюмдай уйиб қўйган, Уммонни Ўз омборига жойлаб сақлаган.
8 Худованддан бутун ер юзи қўрқсин, Барча аҳли жаҳон Ундан қалтирасин.
9 Зеро У сўзлади, худди айтганидай бўлди; У амр берди, амри вожиб бўлди.
10 Худованд мажусийлар ниятини бузади, Халқлар мурод-мақсадини пучга чиқаради.
11 Худованднинг нияти эса боқий туради, Наслдан-наслга жорий бўлади Унинг дил муроди.
12 Худовандни Тангримиз деб билган халқ бахтли! Худованд Ўз мулким деб сайлаган эл иқболли!
13 Худованд осмондан боқар, Барча инсон ўғилларин кўриб турар.
14 Тахти маконидан кузатиб туриб, Бутун жаҳонни текшириб кўрар.
15 У жами инсоннинг юрагини яратган, Инсон қилмишларига ҳам англаб етар.
16 Аскарлари кўплиги билан подшоҳ қутулмас, Қуввати кўплиги учун жангчи зафар топмас.
17 От жангчининг бошини омон сақлаёлиши ёлғондир, Катта кучи билан ҳам уни қутқара билмас.
18 Мана, Худованднинг кўзи Ундан қўрққанларда, Унинг иноятига умид қилганлардадир.
19 У уларнинг жонини ўлимдан қутқазар, Очлик пайтида уларнинг дилига қувват киритар.
20 Жонимиз Худовандга мунтазир, Ёрдамчимиз, қалқонимиз Ўзидир.
21 Қалбимиз У билан шод бўлур, Унинг муқаддас номи бизнинг таянчимиздир.
22 Эй Худованд, биз Сенга умид боғлаганмиз, Яна иноятинг бизга ёр бўлсин!
