Забур 68 bob

Маъюснинг фиғони. ИЖРОЧИЛАР РАҲБАРИГА. «ЛОЛАГУЛ» КУЙИГА. ДОВУД САНОСИ.

1 Қутқаргин мени, эй Худо! Сувлар ҳалқумимга қадар етди.
2 Қутқаргин мени, эй Худо! Сувлар ҳалқумимга қадар етди.
3 Чуқур ботқоқликка ботганман, Оёқ қўядиган жойим йўқ. Тубсиз гирдоб оғушида қолдим, Сел мени олиб кета ёзди.
4 Мен фарёд қилавериб чарчадим, Томоғим қуриб кетди, Худони кутиб кўзим нури сўнди.
5 Мендан ноҳақ нафратланаётганлар Бошимдаги сочлардан ҳам кўп бўлди-ку! Менга беҳуда хусумат қилаётганлар жуда зўр, Улар мени хомуш қилмоқчилар. Мен ҳеч на олмаган бўлсам ҳам, Қайтариб беришга мажбур этяптилар.
6 Эй Худо, ақлсизлигимни Ўзинг биласан, Айбдорлигимни Сендан яширмайман.
7 Ё Раббий, Сарвари коинот, Сенга умид қилганлар уятга қолмасин, Мен сабабли, эй Исроил Худоси, Таваккал қилувчилар бўлмасин хижолат!
8 Мен Сен деб ҳақоратга чидаяпман, Хижолатдан юзим шувут.
9 Ака-укамга, ўз онамнинг ўғилларига Ғарибу бегона бўлиб қолдим.
10 Сенинг уйингга бўлган рашким Менинг ичимни кемиряпти. Сени таҳқир қилувчиларнинг ҳақорати Менинг бошимга тушди.
11 Йиғлаб, рўза тутиб жонимни қийнасам, Бу ҳам ҳақорат саналди менга.
12 Қанорни* ўзимга уст-бош қилганимда, Улар учун афсона бўлдим.
13 Шаҳар киришида ўтирганлар оғзига тушдим, Майхўрлар таронасига ҳадаф бўлдим.
14 Эй Худованд, Сен лутф қилган чоғинг Ибодатимни Сенга йўллайман, Эй Худо, Сенинг иноятинг беҳад экан, Менга қатъий нажот юборгин!
15 Мени балчиқдан чиқариб қўй, ботиб кетмайин! Мендан нафратланаётган одамлардан, Чуқур сувлардан халос бўлайин!
16 Сел сувлари мени олиб кетмасин, Тубсиз чуқурлик мени ютмасин, Қудуқ оғзи устимдан ёпилмасин!
17 Менга қулоқ бергин, эй Худованд! Сенинг лутфу караминг беқиёс, Раҳмдиллигинг эса беҳисоб экан, Менга эътибор бергин!
18 Юз ўгирма қулингдан, Кулфатдаман, менга тез жавоб бергин!
19 Яқинроқ келиб, жонимни халос қилгин, Менга нажот бер, душманларим уялсин!
20 Бошимга не-не ҳақоратлар тушди, Қанчалик расвою шармисор бўлдим, Ўзинг биласан! Ёвларимнинг ҳаммаси Сенинг кўз ўнгингда.
21 Шармандаликдан юрагим қон бўлди, Ўлар ҳолатда дармонсизман. Шафқат кутдим, аммо беҳуда; Тасалли қидирдим, лекин топмадим.
22 Емагим учун менга заҳар бердилар, Ташналигимда менга сирка ичирдилар.
23 Ўз дастурхонлари уларга қопқон бўлсин, Ўз ҳамсуҳбатлари уларга тузоқ бўлсин!
24 Уларнинг кўз нури сўниб қолсин, Беллари доим титрайдиган бўлсин!
25 Сен ғазабингни уларнинг бошига соч, Қаҳрингга дучор қил уларни!
26 Уларнинг маскани ҳувиллаб қолсин, Чодирларида тирик жон қолмасин!
27 Сендан жафо чекканларни улар қувади, Сен яралаган одамларнинг ярасини эса Қайта-қайта ковлайдилар.
28 Уларнинг гуноҳига гуноҳ қўшгин, Уларни мутлақо оқламагин!
29 Ҳаёт китобидан ўчирилсинлар, Солиҳлар билан бирга ёзилмасинлар!
30 Мен-ку бечораман, азобдаман; Эй Худо, Ўз нажотинг ила мени тиклагин!
31 Қўшиғимда Худонинг номини шарафлайман, Шукроналар билан Уни улуғлайман.
32 Ана шу ҳар қандай туёқли, шохли буқадан Ёки ҳўкиздан кўра Худовандга мақбул келади.
33 Ҳақирлар буни кўриб севинадилар. Эй, барча Худога интилаётганлар, Сизнинг дилингизга яна жон кирсин!
34 Худованд бечоралар фиғонини эшитар, Асир тушган Ўз азизларини хор қилмас.
35 Ер ҳам, кўк ҳам, денгизлар ҳам, Унда қайнайдиган бор махлуқотлар ҳам Худога ҳамду санолар айтишсин!
36 Зеро Худо Сионга нажот юбориб, Яҳудо шаҳарларини ободон қилажак. Улар диёрни эгаллаб, тинч яшашажак.
37 Худо қулларининг насли унга ўрнашажак, Худо номини севгучилар унда ҳузур топажак.