Қариганда Худодан ёрдам сўраш
Забур 70 bob
1 Эй Худованд, Сени паноҳ тортиб келаман, Абадий шарманда бўлмайин!
2 Адолатинг хотири учун менга нажот бергин, Қулоғингни мен томонга тутгин, Токи кулфатдан қочиб халос бўлайин!
3 Сен мен учун суянар қоя бўлгин, Доим қочиб беркинар жойим бўлгин! Мени қутқармоққа амр бергансан-ку, Якка Ўзингсан менинг суянчиғим, қўрғоним!
4 Эй Худойим, Қутқар мени фосиқ одамлардан, Нопоку тажовузкорлар панжасидан!
5 Менинг умидим Сенсан-ку, ё Раббий, Ёшлигимдан бери ишончимсан, эй Худованд!
6 Туғилганимдан буёқ Сенга суянганман, Онам қорнидан Ўзинг ёруғ дунёга чиқардинг, Сени қанчалар мадҳ қилсам оздир.
7 Мен кўплар назарида ажиб бўлиб қолдим, Илло Сен менинг қудратли паноҳимсан.
8 Савлатинг кун бўйи кўз ўнгимда менинг, Ҳамду санойинг тушмас тилимдан менинг.
9 Қариган чоғимда мени ташлаб кетма, Қувватим битганда мени тарк этма!
10 Душманларим менга қарши тил биркитмоқда, Ўзаро кенгашиб, жонимга қасд қилмоқдалар.
11 «Худо уни ташлаб қўйган, деяптилар, Қувиб етиб тутинглар уни, Уни қутқарадиган қолмабди-ку».
12 Эй Худо, мендан узоқлашма, Менга ёрдам бермоққа шошгин, эй Худойим!
13 Жоним душманлари шарманда бўлсин, йўқолсин! Менга ёмонликни раво кўрганлар уялсин, Расвои олам бўлсинлар!
14 Менга қолса, доим Сенга умид боғлайман, Сенга мақтовларни оширавераман.
15 Сенинг адолатингни кун сайин ҳикоя этаман, Нажоткорлигингни тилдан қўймайман мутлақо. Синоатларингни қанча баён этсам оздир!
16 Мен Раббимнинг куч-қудратига суяниб бораман, Сенинг ҳақиқатингдан бўлак ҳеч на тилга олмасман, эй Худованд.
17 Ёшлигимданоқ Ўзинг мени ўргатгансан, эй Худо, Ҳозирга қадар мўъжизаларингни хабарлаб юраман.
18 Эй Худо, мен қартайганимда ҳам, Сочимга оқ тушганда ҳам мени тарк этма, Токи шу наслга Сенинг қудратингни баён этай, Келажак авлодга эса ботирлигингни эълон этай!
19 Эй Худо, осмондай юксакдир адолатинг, Сен улуғ ишлар бажаргансан. Сен каби ким бор, эй Худо?
20 Сен мени кўп ёмон фалокатларга йўлиқтирдинг, Энди қайта жонлантиргин мени! Ернинг қаъридан қайтариб чиқаргин мени!
21 Мени яна юксалтириб, таскин бергин!
23 Мен Сени тараннум этавераман, Лаб-даҳаним Сени куйлайверсин, Сен қутқарган жоним ҳам куйласин.
24 Адолатингни тилдан қўймасман асло. Менга ёмонлик истаганларни қаранг, Улар шармандаю, юзлари шувут бўлди!
222 Эй Худо, Сенга шукрлар дейман, Сенинг садоқатингни чангда куйлайман, Ғижжак чалиб Сени куйлайман, Эй Исроилнингмуқаддас Тангриси!
