1 Қамоқда Юсуфнинг туш таъбирлаши
Ибтидо 40 bob
1 Бу ҳодисалардан сўнг Миср подшоҳининг соқийси ва новвойи ўз жаноблари – Фиръавнга қарши гуноҳ қилдилар.
2 Ўзининг бош соқийси ва бош новвойи бўлган бу иккала маъмуридан Фиръавн аччиқланиб,
3 уларни қаматиб қўйди. Улар ётган қамоқхона соқчилар бошлиғининг назорати остида бўлиб, у ерда Юсуф ҳам маҳбус эди.
4 Соқчиларнинг бошлиғи Юсуфни буларга малай қилиб қўйди. Шундай қилиб, Юсуф уларга хизмат қилар эди.
5 Миср подшоҳининг соқийси билан новвойи бир муддат қамоқда ётганларидан кейин, бир кечанинг ўзида иккаласи бирдан туш кўришди. Ҳар бир тушнинг ўзига хос маъноси бор эди.
6 Саҳар туриб, Юсуф уларнинг ёнига келди, ҳар икковининг кўнгли хуфтон эканини кўрди.
7 Юсуф ўзи билан бир қаторда хўжайини – Фиръавннинг уйида асир бўлган бу маъмурлардан: – Нима учун бугун юзларингиз ғамгин? – деб сўради.
8 Улар: – Биз туш кўрдик, аммо тушни таъбир қиладиган кишини тополмадик, – дейишди. Юсуф уларга: – Тушнинг таъбирлари Худодан эмасми? Менга тушунтириб беринглар-чи, – деди.
9 Шунда бош соқий тушини Юсуфга ҳикоя қилди: – Мен тушимда олдимда бир ток кўрдим.
10 Токда учта новда бор экан. Новдалар ўсиб, гуллаб, шингил-шингил узумлар пишди.
11 Менинг қўлимда Фиръавннинг косаси бор экан. Мен узумларни олиб сиқдим ва Фиръавннинг косасига қуйиб, косани унинг қўлига бердим, – деди.
12 Юсуф унга: – Тушнинг таъбири шу: уч новда – уч кун.
13 Мана уч кундан кейин Фиръавн сенинг бошингни юксалтириб, аввалги мансабингга қайтаради. Худди унга соқийлик қилган вақтда қилганингдай, аввалги тартиб бўйича яна Фиръавннинг косасини унинг қўлига берасан.
14 У сенга ҳиммат қилганидан сўнг, мени ҳам эслаб тургин. Марҳамат қилиб Фиръавн ҳузурида мени ёдингга келтир ва мени бу қамоқхонадан чиқариб олишга тиришгин.
15 Мени ибронийларнинг еридан ўғирлаб кетишгани етмагандек, энди бу ерда ҳам бирон-бир жиноят қилмай, бу чуқурга тиқиб қўйилдим, – деди.
16 Бош новвой эса Юсуф бояги тушни яхшиликка йўйганини кўргач: – Мен ҳам туш кўрдим, – деди. – Бошим устида учта саватда кулча бор экан.
17 Энг устки саватда новвойлар Фиръавн учун махсус тайёрлаган ҳар хил таомлар бор экан. Лекин қушлар келиб, бошим устидаги саватдан уларни чўқиб кетди.
18 Юсуф жавоб берди: – Тушнинг таъбири шу: уч сават – уч кун.
19 Мана шу уч кундан кейин Фиръавн бошингни танангдан жудо қилиб, сени дорга остиради, қушлар келиб этингни танангдан чўқиб кетади, – деди.
20 Орадан уч кун ўтиб, Фиръавн ўзининг туғилган кунини нишонлаш муносабати билан бутун мулозимлари учун зиёфат қилди. Мулозимларидан ўзининг бош соқийси билан бош новвойини ҳам ўртага чиқарди.
21 Бош соқийни ўз мансабига қайтарди ва у яна косани Фиръавн қўлига берди.
22 Лекин бош новвойни эса, Юсуф таъбир қилганидек, дорга остирди.
23 Шундан сўнг бош соқий Юсуфни бошқа эсламади, уни унутиб юборди.
