1 Shoh Kurush — Egamizning tanlagani. 14 Faqatgina Egamiz Xudo va najotkordir.
Ishayo 45 bob
1 Egam aytar: “Men shoh Kurushning o‘ng qo‘lini kuchaytirdim. Xalqlarni unga itoat ettiray, deya Shohlarni qurolsizlantiraman. Uning oldida eshiklar ochiq turadi, Darvozalar yopilmaydi.” Egamiz O‘zining tanlagani — Kurushga shunday aytmoqda:
2 “Men O‘zim Sening oldingda boraman, Tog‘larni tekislikka aylantiraman, Bronza eshiklarni parchalayman, Temir tambalarni sindiraman.
3 Men Egang ekanligimni bilib olgin, Sening ismingni aytib chaqirayotgan Men Isroil xalqining Xudosi ekanligimni anglagin, deb Yashirib qo‘yilgan boyliklarni, Zulmatdagi xazinani senga beraman.
4 Qulim Yoqub haqi, O‘zim tanlagan Isroil haqi, Sening ismingni aytib chaqirdim. Senga nom ato qildim, Ammo sen Meni bilmaysan.
5 Men Egangman, boshqasi yo‘q, Mendan boshqa xudolar yo‘q! Senga madad beraman, Ammo Meni bilmaysan.
6 Mendan boshqa biri yo‘qligini Sharqu g‘arbda hamma bilsin, dedim. Men Egangman, boshqasi yo‘q!
7 Men yorug‘lik yarataman, zulmat bino qilaman, Farovonlik yuboraman, kulfat yog‘diraman. Men Egangman! Bularning hammasini Men qilaman!
8 Ey samolar, yuqoridan solihlik yog‘diring, Ha, solihlik bulutlardan quyilsin. Yer ochilib, najot kelib chiqsin, Solihlik bilan birga yashnasin. Men Egangizman! Men uni yaratganman.”
9 Holingizga voy! Ey Yaratuvchi bilan bahslashadiganlar! Tuproqdan yasalgan ko‘zayu xumlar! Axir, loy kulolga: “Nima qilyapsan?” deydimi?! “Yasayotgan narsangning qo‘llari yo‘q–ku!” deb aytadimi?!
10 Ey otasiga: “Nimaga tug‘diryapsiz?” degan bolalar! Onasiga: “Nimaga tug‘yapsiz?” degan farzandlar! Sizlarning holingizga voy!
11 Isroil xalqining muqaddas Xudosi, Uning Yaratuvchisi — Egamiz shunday aytmoqda: “Xo‘sh, endi O‘z farzandlarimning Taqdiri haqida Meni so‘roqqa tutasizmi?! O‘z qo‘llarim ijodi to‘g‘risida Menga ko‘rsatmalar berasizmi?!
12 Zaminni barpo qilgan, Yer yuzida insonni yaratgan Menman. Men O‘z qo‘lim bilan osmonni yoydim, Barcha samoviy jismlarga Men buyruq berdim.
13 Men O‘zim Kurushni qo‘zg‘atib, Unga g‘alaba beraman. Uning barcha yo‘llarini tekislayman. U Mening shahrimni quradi. Porayu mukofot olmasdan Mening asirlarimni qo‘yib yuboradi.” Sarvari Olam shunday dedi.
14 Egamiz aytmoqda: “Misrning boyliklari, Habashistonning tijorat foydalari seniki bo‘ladi! Savo yurtining baland bo‘yli odamlari senga keladi. Ular senga ergashadi. Zanjirband bo‘lib, senga ta’zim qiladi. Yolvorib: ‘Ha, Xudo sizning orangizda! Boshqa hech bir xudo yo‘q!’ deydi.”
15 Ey Isroil xalqining Xudosi — Qutqaruvchi! Haqiqatan ham, Sen O‘zini yashiradigan Xudosan.
16 But yasaydiganlar birgalikda uyatga qoldi. Hammasi sharmandayu sharmisor bo‘ldi.
17 Isroilni esa Egamiz qutqardi, To abad najot berdi! Sizlar sharmanda bo‘lmaysiz, To abad uyatga qolmaysiz!
18 Egamiz Samolarni yaratgan U Xudodir! U yerni barpo qilgan, mustahkamlagan. Yerni bo‘sh qilib emas, Yashashga loyiq qilib yaratgan. U shunday deb aytmoqda: “Men Egangizman, boshqasi yo‘q.
19 Men sizlarga yashirin joyda, Zulmatli yurtda gapirmadim. Men Yoqub nasliga: ‘Bo‘sh joylardan Meni qidiring!’ deb aytmadim. Men Egangizman. Haqiqatni aytaman, To‘g‘risini e’lon qilaman.
20 Ey xalqlarning omon qolganlari, Yig‘ilinglar, yaqinlashib, birga kelinglar! Yog‘och butlarini olib yuradiganlar, Qutqarmaydigan xudoga ibodat qiladiganlar Hech narsani anglab yetmaydilar.
21 Gapiring, isbot keltiring. O‘zaro maslahatlashing. Bu to‘g‘rida kim qadimdan xabar berdi? Azaldan kim aytib bergan edi? Men Egangiz emasmi?! Mendan boshqa xudolar yo‘q! Men odil Xudoman, Qutqaruvchiman! Mendan boshqasi yo‘q.
22 Menga yuz buring, najot topasiz, Ey zaminning barcha chetlari! Ha, Men Xudoman, boshqasi yo‘q.
23 O‘zim haqim ont ichdim, Og‘zimdan to‘g‘ri so‘z chiqdi, behuda ketmas. Chunki Mening oldimda har bir tizza cho‘kka tushadi, Har bir til Menga sadoqat qasamini ichadi.
24 Men haqimda: ‘Faqatgina Egamizda adolat, qudrat bor’, deb aytadilar. Mendan g‘azablanganlarning hammasi Menga keladilar, ular uyalib qoladilar.
25 Ammo butun Isroil nasli Men, Egasi tufayli najot topadi. Ular maqtovga sazovor bo‘ladi.”
