1 Shukrona qo‘shig‘i. 6 Xudo ziyofat tayyorlaydi. 10 Xudo Mo‘abni jazolaydi.
Ishayo 25 bob
1 Ey Egam, Sen mening Xudoyimsan. Sen ajoyib ishlar qilgansan, Men Seni sharaflayman. Qadim davrlardan rejalar tuzgansan, Ular sadoqatli va ishonchlidir.
2 Yakson qilding dushmanlarimiz qal’alarini, Vayronaga aylantirding mustahkam shaharlarini, Yo‘q qilding uzoq yurtdagi ajoyib saroylarini, Ular hech qachon qayta tiklanmas.
3 Endi kuchli xalqlar Seni izzat qiladi, Shafqatsiz xalqlar Senga sajda qiladi.
4 Kambag‘al, bechoralar kulfatda qolganda, Sen ularga boshpana bo‘lding. Peshindagi jaziramadan soya, Jaladan panoh bo‘lding. Vahshiy g‘animlarning hujumi bo‘ronday bo‘ldi. Sen esa bizning panohimiz bo‘lding.
5 Dushman shovqin–suroni Sahro issig‘i kabi bo‘lganda, Jazirama issiqni Sen Bulutlar soyasi ila bosding. Dushmanning sevinch qo‘shig‘i Sadolarini o‘chirding.
6 Bu tog‘da Sarvari Olam Jamiki xalqlar uchun Ajoyib ziyofat tayyorlar. Boy dasturxon, sara sharoblar, Yog‘li go‘shtlar, tiniq sharob tortiladi.
7 O‘sha kuni Egam jamiki xalqlar ustidan Kafanlarini yechib tashlaydi. Mana shu tog‘da Egam Xalqlarni o‘ragan, elatlar ustidagi Yopinchiqni olib tashlaydi. Ha, U o‘limni butunlay yutib yuboradi.
8 Egam Xudo hammaning ko‘z yoshlarini artib qo‘yadi, Butun yer yuzida O‘z xalqining uyatini olib tashlaydi. Ha, Egam shunday deb aytgan!
9 O‘sha kuni ular shunday deydilar: “Mana, bizning Xudoyimiz, Qutqarsin, deb uni kutgandik, U bizga najot berdi. Kelinglar, quvonaylik, sevinaylik! Umid qilib kutgandik, Mana, bizning Egamiz.”
10 Egamning O‘zi bu tog‘ni himoya qilar. Mo‘ab xalqi yanchilgan somonday ezilar, Chiritish uchun go‘ng chuqurga uloqtirilar.
11 Ha, ular bor kuchi bilan Suzuvchiga o‘xshab chuqurdan chiqishga intilar. Ammo Xudo ularning g‘ururini yakson qilar, Qo‘llarining mohirligi foyda bermas.
12 Mo‘abning qal’a devorlari buzib tashlanar, Vayronaga aylanar, yer bilan yakson bo‘lar.
