1 Egamiz Isroil xalqini qutqarishga va’da beradi. 14 Muso va Horunning nasl–nasabi. 28 Egamiz Muso bilan Horunga fir’avnga gapirishlari uchun amr beradi.
Chiqish 6 bob
1 Shundan so‘ng Egamiz Musoga aytdi: — Fir’avnni nima qilishimni endi ko‘rasan. U qudratli kuchimni ko‘rgandan keyin, xalqim ketishiga ijozat beribgina qolmaydi, hatto xalqimni o‘z yurtidan quvlab yuboradi.
2 Xudo Musoga yana dedi: — Men Egangizman.
3 — Ibrohimga, Is’hoqqa va Yoqubga Men Qodir Xudo bo‘lib O‘zimni zohir qildim. Ammo ularga Men, ularning Egasi, deb tanilmagan edim.
4 Ular Kan’on yurtida musofir bo‘lib yashagan edilar. O‘sha yurtni sizlarga beraman, deb ular bilan ahd qildim.
5 Misrliklar qul qilgan Isroil xalqining faryodini aniq eshitdim. Men o‘sha ahdimni yodimda tutaman.
6 Shunday qilib, bu to‘g‘rida Isroil xalqiga Mening shu gapimni yetkaz: “Men Egangizman. Men sizlarni Misrliklarning zulmidan ozod qilaman, qullikdan olib chiqaman. Qudratli kuchim va hukmning buyuk ishlari bilan sizlarni qullikdan ozod qilaman.
7 Men sizlarni O‘zimning xalqim qilaman, Men sizlarning Xudoyingiz bo‘laman. Sizlarni Misrliklarning zulmidan xalos qilgan Egangiz Xudo Men ekanligimni o‘shanda bilib olasizlar.
8 Men Ibrohimga, Is’hoqqa va Yoqubga ont ichib, beraman, degan yurtga sizlarni olib boraman. O‘sha yurtni sizlarga mulk qilib beraman. Men Egangizman.”
9 Muso bu gaplarni Isroil xalqiga aytgan edi, ammo xalq uning gaplariga quloq solmadi. Chunki xalq og‘ir zulm ostida qolib, ruhan tushkunlikka tushgan edi.
10 Shundan keyin Egamiz Musoga aytdi:
11 — Misr fir’avni huzuriga borib ayt: Isroil xalqi Misrdan chiqib ketishiga ijozat bersin.
12 — Gapimga Isroil xalqi quloq solmadi–yu, fir’avn quloq solarmidi?! — dedi Muso. — Qolaversa, yaxshi gapira olmayman–ku!
13 Ammo Egamiz Muso bilan Horunga amr qildi: “Misr fir’avni oldiga qaytib boringlar. Isroil xalqi Misrdan ketishiga ijozat bering, deb talab qilinglar.”
14 Ba’zi Isroil qabilalarining urug‘boshilari quyidagilardir: Yoqubning to‘ng‘ich o‘g‘li Ruben nasliga Xano‘x, Palluv, Xazron va Karmi kiradi. Ularning nasli Ruben urug‘lari edi.
15 Shimo‘nning nasliga Yamuvol, Yomin, Oxad, Yoxin, Zo‘xar va Kan’onlik ayoldan tug‘ilgan o‘g‘li Shovul kiradi. Ularning nasli Shimo‘n urug‘lari edi.
16 Levi nasliga Gershon, Qohot va Marori kiradi. Levi 137 yil yashadi. Bu nasldan kelib chiqqan urug‘lar quyidagilardir:
17 Gershonning nasliga Lubnax va Shimax kiradi, ularning har biri urug‘boshilardir.
18 Qohotning nasliga Imrom, Izxor, Xevron va Uziyol kiradi. Qohot 133 yil yashadi.
19 Marorining nasliga Maxli va Mushi kiradi. Yuqoridagi ro‘yxat Levi nasli va ularning urug‘larinikidir.
20 Imrom o‘zining ammasi Yo‘xavadga uylandi. Imrom xotinidan Horun va Musoni ko‘rdi. Imrom 137 yil yashadi.
21 Izxorning nasli Ko‘rax, Nafax va Zixridir.
22 Uziyolning nasli Mishail, Elzafan va Sitridir.
23 Horun Elishbaga uylandi. U Ominadovning qizi, Naxsho‘nning singlisidir. Horun xotinidan Nadov, Abihu, Elazar va Itamarni ko‘rdi.
24 Ko‘raxning nasli Aser, Elqana va Abuasafdir. Ularning nasli Ko‘rax urug‘lariga asos soldi.
25 Horunning o‘g‘li Elazar Futiyolning qizlaridan biriga uylandi. Elazar xotinidan Finxazni ko‘rdi. Urug‘lari bo‘yicha Levi qabilasining urug‘boshilari ana shulardir.
26 Yuqorida aytib o‘tilgan Horun va Musoga Egamiz: “Isroilning har bir oilasi va qabilasini Misrdan olib chiqinglar!” deb amr berdi.
27 Ular: “Isroil xalqini ozod qiling”, deb Misr fir’avniga buyruq berdilar.
28 Shunday qilib, Egamiz Muso bilan Misrda gaplashganda,
29 unga: “Men Egangizman, senga aytganlarimning hammasini Misr fir’avniga yetkaz!” deb amr bergan edi.
30 Muso esa Egamizning oldida: “Men yaxshi gapira olmayman–ku! Fir’avn mening gapimga quloq solmaydi!” degan edi.
