1 Muqaddas chodir uchun nazrlar. 10 Ahd sandig‘i va uning qopqog‘iga oid ko‘rsatmalar. 23 Muqaddas nonlar qo‘yiladigan xontaxtaga oid ko‘rsatmalar. 31 Chiroqpoyaga oid ko‘rsatmalar.
Chiqish 25 bob
1 Egamiz Sinay tog‘ida Musoga dedi:
2 “Isroil xalqiga, Egamizganazr qilinglar, deb ayt. Menga chin ko‘ngildan nazr qilgan odamning nazrini qabul qil.
3 Quyidagilar sen ulardan qabul qilib oladigan nazrlardir: oltin, kumush, bronza,
4 ko‘k, safsar, qirmizi rangli ip, mayin zig‘ir matosi, echki juni,
5 qizilga bo‘yalgan qo‘chqor terisi, yumshoq teri, akas yog‘ochi,
6 moychiroqlar uchun zaytun moyi, muqaddas qiladigan moy uchun ziravorlar, xushbo‘y hidli tutatqi uchun ziravorlar,
7 efodga taqiladigan aqiq va ko‘krakpechga taqiladigan boshqa qimmatbaho toshlar.
8 Isroil xalqi Men uchun muqaddas maskan barpo qilishsin, toki Men Isroil xalqi orasida istiqomat qilayin.
9 Bu Muqaddas chodirni va uning hamma jihozlarini Men senga ko‘rsatadigan namunaga muvofiq yasat.
10 Akas yog‘ochidan sandiq yasat. Sandiqning uzunligi ikki yarim tirsak, eni bir yarim tirsak, bo‘yi bir yarim tirsak bo‘lsin.
11 Sandiqning ichkariyu tashqarisini toza oltin bilan qoplat. Aylanasiga oltin gulchambar qildir.
12 Sandiq uchun eritilgan oltindan to‘rtta halqa yasatib, to‘rtala oyog‘iga mahkamlat: ikkita halqa bir tomonida, ikkita halqa ikkinchi tomonida bo‘lsin.
13 Keyin akas yog‘ochidan xodalar yasatib, xodalarni oltin bilan qoplat.
14 Xodalarni sandiqning ikkala tomonidagi halqadan o‘tkaz, toki xodalar yordamida sandiqni ko‘tarib yurishsin.
15 Xodalar sandiqning halqalaridan ayirib olinmasin, doimo tursin.
16 Men senga beradigan ahdning amr va qonunlari yozilgan ikkita tosh lavhani sandiqqa solib qo‘y.
17 Toza oltindan sandiqning qopqog‘ini yasat. Bu qopqoqning uzunligi ikki yarim tirsak, eni bir yarim tirsak bo‘lsin.
18 Shu bilan birga, oltindan ikkita karub yasat: ikkala karubni ham qopqoqning ikki chetiga zarb urib yasat.
19 Bitta karub qopqoqning bir chetida, ikkinchi karub ikkinchi chetida bo‘lib, har ikkalasi qopqoq bilan bir butunni tashkil qilsin.
20 Karublarning tepaga ko‘tarilgan qanotlari qopqoqni berkitib tursin. Ular yuzma–yuz turib, qopqoqqa qaragan bo‘lsin.
21 Qopqoqni sandiqning ustiga qo‘y. Men senga beradigan ikkita tosh lavhani sandiqqa sol.
22 Ahd sandig‘i ustida Men sen bilan uchrashaman. Karublar o‘rtasidagi gunohdan poklash joyi tepasidan Men senga gapirib, Isroil xalqi uchun hamma amrlarimni senga beraman.
23 Akas yog‘ochidan xontaxta yasat. Xontaxtaning uzunligi ikki tirsak, eni bir tirsak, bo‘yi bir yarim tirsak bo‘lsin.
24 Xontaxtani toza oltin bilan qoplatib, chetlariga aylantirib oltin gulchambar yasat.
25 Yana xontaxtaning atrofi bo‘ylab to‘rt enli qilib oltin bilan qoplangan taxta qildirib, uni xontaxta oyoqlariga mahkamlat. Oltin gulchambarni xontaxtaning aylanasi bo‘ylab taxta ustiga qildir.
26 Yana to‘rtta oltin halqa yasatib, har birini taxta mahkamlangan joyning yoniga — to‘rtala burchagidagi to‘rtala oyog‘iga o‘rnashtir.
27 Akas yog‘ochidan ikkita xoda yasatib, ularni oltin bilan qoplat.
28 Bu yog‘ochlarni halqalardan o‘tkazib, xontaxtani ko‘tarib yurish uchun foydalan.
29 Xontaxtaga qo‘yiladigan lagan, piyolalar, sharob nazr qilish uchun ko‘za va kosalar yasat. Bu buyumlarni toza oltindan yasat.
30 Mening huzurimdagi xontaxtada doim muqaddas nonlar tursin.
31 Toza, zarb qilingan oltindan chiroqpoya yasat. Butun chiroqpoya va uning bezaklari bir butun qilib yasalsin. Chiroqpoyaning tagligi, tanasi, kurtakli gulga o‘xshash shakldagi piyolalari bo‘lsin.
32 Yana chiroqpoyaning tanasidan oltita shoxcha chiqarilsin: uchta shoxchasi bir yonidan, uchta shoxchasi ikkinchi yonidan chiqarilsin.
33 Chiroqpoyaning tanasidan chiqadigan shoxchalarning har birida kurtakli bodom guliga o‘xshash shakldagi uchta piyola bo‘lsin.
34 Chiroqpoyaning tanasida kurtakli bodom guliga o‘xshash shakldagi to‘rtta piyola bo‘lsin.
35 Chiroqpoyaning tanasidan chiqadigan shoxchalarning har juftida bu kurtaklardan uchtasi birin–ketin tizilib tursin.
36 Chiroqpoya, shoxchalari va kurtaklari bilan bitta qilib zarb qilingan toza oltinning yaxlit bo‘lagidan yasalishi lozim.
37 Chiroqpoyaga yettita moychiroq yasatib, unga hammasini o‘rnashtir, toki moychiroqlar chiroqpoyaning old tomonini yoritib tursin.
38 Moychiroqlarga qarab turish uchun toza oltindan qisqichlar va patnislar yasat.
39 Chiroqpoyani va bu buyumlarni ikki pud toza oltindan yasashsin.
40 Ehtiyot bo‘l, o‘sha hamma buyumlarni Men senga shu yerda — tog‘da ko‘rsatgan namunaga muvofiq yasat.
