1 Qurigan suyaklar vodiysi. 15 Yahudo bilan Isroil bir shohlik bo‘ladi,
Hizqiyo 37 bob
1 Egamizning qudrati meni qamrab oldi. Egamizning Ruhi meni ko‘tarib, vodiyning o‘rtasiga qo‘ydi. Vodiy suyaklarga to‘la edi.
2 Ruh meni vodiydagi bir dunyo suyaklar orasida aylantirib yurdi. Suyaklar qurib ketgan edi.
3 Ruh menga: — Ey inson, bu suyaklar tirilishi mumkinmi? — deya savol berdi. — Yo Egam Rabbiy, bunisi yolg‘iz O‘zingga ayon, — deya javob berdim men.
4 So‘ng U menga shunday dedi: — Suyaklarga bashorat qilib ayt: “Ey qurigan suyaklar, Egamizning so‘zini eshiting!
5 Egam Rabbiy suyaklarga shunday demoqda: Men ichingizga ruh solaman, sizlar tirilasizlar.
6 Ustingizni payu mushaklar bilan qoplab, teri tortaman, ichingizga ruh solib, sizlarni tiriltiraman. O‘shanda Egangiz Men ekanligimni bilib olasizlar.”
7 Egamiz menga amr qilganiday, men Uning bu so‘zlarini bashorat qilib aytdim. Bashorat qilayotganimda birdaniga qulog‘imga taraq–turuq ovozlar chalindi, suyaklar birlasha boshladi.
8 Qarasam, suyaklar payu mushaklar bilan qoplandi, so‘ng ustilariga teri tortildi. Biroq tanalarda hanuz ruh yo‘q edi.
9 Egamiz menga shunday dedi: — Endi shamolga shunday buyruq ber: “Ey shamol, Egamiz Rabbiy aytmoqda, har tomondan esib, bu o‘ldirilganlarni tiriltir.”
10 Men Egamizning aytganini qildim. Shamol tanalarning ichiga kirib, odamlarni tiriltirdi. Ular turganlarida buyuk bir olomonni tashkil qilishdi.
11 Keyin Egamiz menga shunday dedi: — Ey inson, butun Isroil xalqi mana shu suyaklarga o‘xshaydi. Ular: “Suyaklarimiz qurib ketdi, kelajakka hech qanday umid yo‘q”, — deb nola qilishadi.
12 Shuning uchun xalqimga bashorat qilib ayt: Egamiz Rabbiy shunday demoqda: “Ey xalqim Isroil, Men qabrlaringizni ochib, sizlarni go‘rdan chiqaraman. So‘ng sizlarni o‘z yurtingiz — Isroilga qaytarib olib boraman.
13 O‘shanda sizlar Egangiz Men ekanligimni bilib olasizlar.
14 Men sizlarning ichingizga Ruhimni solaman, sizlarni tiriltiraman. Ona yurtingizga olib borib, u yerda o‘rnashtiraman. O‘shanda Men, Egangiz aytgan gaplarimni amalga oshirganimni sizlar bilib olasizlar” Egamizning kalomi shudir.
15 Egamiz menga O‘z so‘zini ayon qildi:
16 “Ey inson, bir tayoq olib, uning ustiga “Yahudo shohligi”, deb yoz. So‘ng boshqa bir tayoq olib, uning ustiga “Isroil shohligi”, deb yoz.
17 Keyin ikki tayoqning uchlarini bir qo‘lingda shunday qilib ushlaginki, ular bir tayoqday bo‘lib ko‘rinsin.
18 Odamlar sendan: “Bu bilan bizga nima demoqchisan?” deb so‘raganlarida,
19 ularga shunday deb javob ber: Egamiz Rabbiy demoqda: “Men Isroil shohligini bildiruvchi tayoqni olaman. Uni Yahudo shohligining tayog‘i bilan birlashtiraman. Ikkala tayoqni bitta qilib, qo‘limda ushlayman.”
20 Qo‘lingdagi tayoqlarni hamma ko‘radigan bo‘lsin,
21 so‘ng xalqqa ayt: “Egamiz Rabbiy shunday demoqda: Men har yoqqa tarqalib ketgan xalqimni o‘zga xalqlar orasidan yig‘ib olaman. Ularni o‘z yurtlariga olib kelaman.
22 Ularni o‘sha yurtda yagona bir xalq qilaman. Ha, Isroil tog‘larida ulardan yagona davlat yarataman. Ustilaridan bir shoh tayinlayman, ular hech qachon ikki shohlikka ajralmaydilar.
23 Butlar va makruh xudolar tufayli o‘zlarini bulg‘amaydilar, gunohdan o‘zlarini pok saqlaydilar. Ular gunoh qilib, yashagan hamma manzilgohlardan Men ularni xalos qilaman. Dillarini poklab tozalayman. Shunda ular Mening xalqim, Men esa ularning Xudosi bo‘laman.
24 Qulim Dovud ularning shohi bo‘ladi. Ha, hammasini bir cho‘pon boshqaradi. Ular qonun– qoidalarimga rioya qilib, farmonlarimni bitta qoldirmay bajarishadi.
25 Men qulim Yoqubga bergan yerda ular yashaydilar, ajdodlari o‘tgan yurtda istiqomat qiladilar. Bola–chaqalari va butun avlodi o‘sha yurtda abadiy o‘rnashadi. Qulim Dovudning sulolasi ularga to abad hukmronlik qiladi.
26 Men ular bilan tinchlik ahdini tuzaman. Bu mangu bir ahd bo‘ladi. Men ularga baraka beraman, ko‘paytiraman. Ma’badimni ularning orasida abadiy o‘rnashtiraman.
27 Ular orasida maskan quraman, Men ularning Xudosi, ular esa Mening xalqim bo‘ladilar.
28 Men maskanimni ular orasida abadiy o‘rnashtirganimda, Isroilni muqaddas qiladigan Egangiz Men ekanligimni xalqlar bilib oladilar.”
