1 Yahudo shohi Yo‘sh. 15 Ruhoniy Yohayidoning siyosati bekor qilinadi. 23 Shoh Yo‘sh hukmronligining so‘nggi davri.
Solnomalar (ikkinchi kitob) 24 bob
1 Yo‘sh shoh bo‘lganda, yetti yoshda edi. U Quddusda qirq yil hukmronlik qildi. Onasi Bersheva shahridan bo‘lib, ismi Zibiyox edi.
2 Ruhoniy Yohayido hayotligida Yo‘sh Egamizning oldida to‘g‘ri ishlar qildi.
3 Yohayido Yo‘shga ikkita xotin olib berdi. Yo‘sh bu xotinlaridan o‘g‘il–qizlar ko‘rdi.
4 Oradan bir oz vaqt o‘tgach, Yo‘sh Egamizning uyini tuzatishga qaror qildi.
5 U ruhoniylarni va levilarni to‘plab, ularga aytdi: “Yahudo shaharlariga borib, Xudoyimizning uyini tuzatish uchun jamiki Isroil xalqidan yiliga to‘lanadigan soliqni yig‘ib kelinglar. Bu ishni tezlik bilan bajaringlar.” Lekin levilar bu ishni orqaga surdilar.
6 Shunda shoh oliy ruhoniy Yohayidoni chaqirtirib, undan so‘radi: “Nimaga siz levilarni soliq yig‘ib kelishlari uchun jo‘natmadingiz? Egamizning quli Muso Muqaddas ahd chodirining harajatlarini qoplash uchun bu soliqni Isroil jamoasiga solgan– ku.”
7 Qabih ayol Otaliyoning izdoshlari Xudoning uyiga bostirib kirib, u yerdagi Egamizga bag‘ishlangan ashyolarni Baalning sajda marosimlari uchun ishlatgan edilar.
8 Shohning buyrug‘i bilan, bir quti yasalib, Egamiz uyi darvozasining tashqi tomoniga o‘rnatildi.
9 Xudoning quli Muso sahroda Isroil xalqiga solgan soliqni Egamizga olib kelishlari uchun Yahudo va Quddus bo‘ylab e’lon qilindi.
10 Jamiki yo‘lboshchilar va xalq bajonidil soliq pullarini olib kelib, qutini to‘ldiraverdilar.
11 Qutida ko‘p pul yig‘ilganidan keyin, levilar qutini shoh a’yonlariga olib borishar edi. Shohning mirzasi bilan oliy ruhoniyning yordamchisi qutini bo‘shatib, uni o‘z joyiga qaytib qo‘yishar edi. Ular har kuni shunday qilishardi. Shu tariqa ko‘p miqdorda kumush to‘plashdi.
12 Shoh va Yohayido bu kumushlarni Egamizning uyidagi ishlarning boshida turgan odamlarga berdi. Ular esa bu kumushga Egamizning uyini tuzatish uchun tosh teruvchilar, duradgorlar, temir va bronzaga ishlov beradigan ustalarni yolladilar.
13 Hammalari chin yurakdan mehnat qilishdi, Xudoning uyini oldingi holatida tiklab, mustahkamlashdi.
14 Ular hamma ishlarni tugatishgach, qolgan kumushlarni shoh bilan Yohayidoga berishdi. Bu kumushlardan Egamizning uyida ishlatiladigan buyumlar yasaldi: xizmatda va qurbonliklar kuydirishda ishlatiladigan buyumlaru idishlar, shuningdek, oltin va kumushdan yasalgan boshqa anjomlar. Ruhoniy Yohayido davrida Egamizning uyida doimo kuydiriladigan qurbonliklar keltirilardi.
15 Yohayido rosa keksayib, bir yuz o‘ttiz yoshida vafot etdi.
16 U Isroil xalqi, Xudo va Xudoning uyi uchun qilgan xizmatlari evaziga Dovud qal’asida shohlar yoniga dafn qilindi.
17 Yohayidoning vafotidan keyin Yahudo a’yonlari shoh huzuriga kelishib, unga ta’zim qildilar. Shoh ularning maslahatlariga quloq soldi.
18 Natijada xalq ota–bobolarining Xudosi — Egamizning uyini tark etib, Asheraning ustunlariga va butlarga sig‘ina boshladi. Ularning bu gunohlari tufayli, Yahudo va Quddus ustiga Egamiz g‘azabini sochdi.
19 U, xalqimni qaytaray deb, oldilariga payg‘ambarlarni yubordi. Biroq xalq payg‘ambarlarning ogohiga quloq solmadi.
20 Xudoning Ruhi ruhoniy Yohayidoning o‘g‘li Zakariyoni qamrab oldi. Zakariyo xalqning oldida turib, shunday deb aytdi: “Xudo shunday demoqda: Nimaga sizlar Mening amrlarimga itoat etmayapsizlar? Shuning uchun rohat–farog‘atga erisholmaysizlar. Sizlar Meni tark etganlaringiz uchun, Men ham sizlarni tark etaman.”
21 A’yonlar Zakariyoga fitna uyushtirdilar. Shohning farmoni bilan uni Egamizning uyi hovlisida toshbo‘ron qilib o‘ldirdilar.
22 Shoh Yo‘sh Zakariyoning otasi Yohayido ko‘rsatgan olijanobliklarini eslamadi, aksincha o‘g‘lini o‘ldirdi. Zakariyo jon berayotganda: “Egamiz bu qilmishingizni ko‘rib, jazongizni bersin”, dedi.
23 O‘sha yilning oxirida Oram lashkarlari Yo‘shga hujum qilishdi. Ular Yahudo va Quddusni bosib olib, hamma xalq yo‘lboshchilarini o‘ldirishdi, olgan hamma o‘ljalarini Damashq shohiga jo‘natishdi.
24 Garchi Oram lashkarlari ozchilik bo‘lsa ham, Egamiz ularning qo‘liga Yahudoning katta lashkarini topshirgandi. Chunki Yahudo xalqi ota–bobolarining Xudosi — Egamizni tark etgandi. Shunday qilib, shoh Yo‘sh jazosini oldi.
25 Yo‘sh jangda og‘ir yaralandi. Oram lashkari ketishlari bilanoq, Yo‘shning ikki a’yoni ruhoniy Yohayido o‘g‘lining o‘chini olish uchun, Yo‘shga fitna uyushtirib, uni to‘shagida o‘ldirdilar. Yo‘shni Dovud qal’asiga dafn qildilar, biroq shohlar qabriga uni qo‘ymadilar.
26 Yo‘shga fitna uyushtirganlar Ommonlik Shimat degan ayolning o‘g‘li Zobod va Mo‘ablik Shimrit degan ayolning o‘g‘li Yohuzabad edi.
27 Yo‘shning o‘g‘illari to‘g‘risidagi to‘liq axborot, Yo‘shga qarshi aytilgan ko‘p bashoratlar va Xudoning uyi tuzatilgani to‘g‘risidagi ma’lumotlar “Shohlar Kitobiga sharhlar”da bayon etilgan. Yo‘shning o‘rniga o‘g‘li Emoziyo shoh bo‘ldi.
